Tata muerto, hijo irido na tiroteo

Muerto el un fardre de familia mientras irido su hijo na un incidente de tiroteo ya sosede na Valle Vista Homes, na Kasanyangan del Martes denoche.
El sangrino soseso ya principia solamente na un peleya entre cuantos maga residente del mencionao lugar.
Con el maga victima ya conose como canda Abraham Jailani y Uyag, 41, casao y su anacsi Salman Usman y Palo, 17, del mencionao lugar.
Con Jailani ya declara dead on arrival na hospital mientras consu anac ya tene que admiti na critical el condicion.
Con el unu del maga suspechao ya puede aresta durante el follow-up operation del pulis y ya conose como si Kausar Attari y Abdul, 35, casao de Ayer Village, Sta. Barbara.
Asegun na imbestigacion del Tetuan police ta aparese ya comensa el peleya porcausa del mirada del ma ojos donde ya man golpe-golpe estos.
Pero amediante del incidente, derepente si Attari ya arangca su pistola y ya sopla de tiro con el man tata-y-anac.

Facebook Comments