ILOILO CITY – Nagtuga sang eskandalo ang ginhimo sang taxi driver nga kalahi ni Adan matapos tatlo ka kaliwat ni Eva ang iya natilawan.
Apesar nga may asawa na ang taxi driver kag kabataan apang may duha pa gid ini ka babaye nga kahagugma sa diin may bata man siya sa isa.
Ini ang man ang duha ka babaye ang ginsuguran sang isa ka eskandalo nga natabo sa distrito sang Lapaz sa diin gintampa sang isa ka call center agent ang isa ka cashier sang isa ka mall sa Lapaz sang Huwebes sang gab-i , Oktubre 19.
Sa pagpangusisa sang RMN news team, may anak ang magulang ni Inday (call center agent ) sa isa ka taxi driver kag ang taxi driver may relasyon man sa isa ka cashier.
Suno kay alyas Inday ginapakahuy-an sang cashier ang iya magulang sa social media tubtob pati siya ang naulamid naman.
Dugang pa ni Inday, iya na ginahingyo ang cashier nga istoryahan ang ila sitwasyon kag i-settle na lang apang nagapakatig-a ini.
Kagab-i, may ginbakal sa mall si Inday kag natyempohan nga yara man ang cashier.
Nagluntad ang komprontahanay sa tunga ni Inday kag sang cashier kag nagba-isay sa atubang sang madamo nga tawo tubtob gintampa ni Inday sang makaduha ka beses ang cashier.
Yara karon sa paghinakop sang Lapaz PNP si alyas Inday matapos ang natabo.
rmn
