Teacher’s assistant hiring wala uyoni

28

Davao City – Supak ang organisasyon nga Parents Mobilization Action Group (PMAG) nga mugahin og dugang pondo ang Department of Education (DepEd) aron i-sweldo sa i-hire nga Learning Support Assistant (LSA).

Dili uyon si PMAG President Febe Matthew nga mag-alokar og laing pondo ang DepEd aron ibayad sa madawat nga LSA nga mu-asistir sa mga magtutudlo sa pag-abli sa klase sa Oktubre 5, 2020.

Gibutyag ni Matthew nga kaya ra sa mga magtutudlo ang ilang trabaho kon sa pagtutok sa pagtudlo sa mga estudyante pinaagi sa blended learning busa wala na kinahanglana pa ang tabang sa LSA.

Matud ni Matthew nga kon nakaya sa mga pribadong tulonghaan ang blended learning nga walay alalay, makaya usab sa mga magtutudlo sa mga pampublikong tulunghaan ang blended learning bisan og walay mag-asistir kanila.

“I think, I will not agree with that (mag hire og LSA) kay kami gani sa private school nakaya man gani namo nga walay assistant and we just do it on our own tapos sila (DEPED) magha-hire pa ng another assistant, kaya naman nila yan they are being supported by the government and they have a big salary. So, why the government will spend money to hire another assistant for that learning modules whatever they called it?,” tataw ni Matthew.

Segun ni Matthew nga managsuma ra ang pagpanudlo karon sa mga magtutudlo sa pampubliko ug pribadong tulunghaan nga pareho migamit og modules, online, ug virtual apan nakaya sa mga magtutudlo sa pribadong eskwelahan.

Ang bugtong kalainan lang kay ang mga magtutudlo sa gobyerno dagko ug sigurado ang ilang sweldo matag bulan sukwahi sa pribado nga ang sweldo mag-agad sa gidaghanon sa mga estudyante.




Dugang ni Matthew nga mas karon dapat ipakita sa mga magtutudlo sa kagamhanan nga takos sila sa dakong sweldo ug mga benepisyo nga gikuha gikan sa buhis sa katawhan.

Busa gidasig niini ang Deped nga dili na ipadayon ang ilang pagpangayo og dugang pondo aron adunay magamit sa pag-hire og mga LSA nga mag-ayuda sa mga magtutudlo sa pagsugod sa blended learning sa sunod semana.

RadyoMaN Joel Viray

Facebook Comments