Technical Malversation ti Pundo ti SK ti Laoag, Agtultuloy nga Imbestigaren ti Sangguniang Panlalawigan

RMN Laoag – Agtultuloy ti panangsukisok ti Sangguniang Panlalawigan (SP) babaen ti joint committee ti local government, laws, ken committee on youth and sports ti maipagarop a ‘technical malversation’ ti pundo ti Sangguniang Kabataan (SK) iti siudad ti Laoag.

Daytoy ti impakaammo ni Atty. Vicentito Lazo, Sangguniang Panlalawigan, chairman ti committee on appropriation ken vice-chair ti committee on laws.

Kinuna ni Lazo a dagiti saan a nakaatendar nga opisial ken empleyado ti siudad ti laoag iti nasao a panagdinggeg ket pinagpalawagda dagitoy kas kada: Mr. Diomedes Gaiban, Mr. Edgar Pascual, Mr. Hipolito Salva, Mrs. Visitasion Rabago, Ms. Shiela de Leon.


Masapol dagitoy empleyado a mangilawlawag ti pannakaproseso dagiti dokumentos a panagpirma dagiti SK a maipagarup a nakaawat ti nasurok 900 pesos tunggal maysa ngem saan da met a nakaawat.

Iti duktal ti SP, rumrumwar nga umabot ti nasurok 75,000 pesos ti suma total ti saan a naibanag manipud iti a maited kuma kadagiti SK chairmen bayat ti panagatendar da ti seminar workshop para iti gungloda iti maysa a resort iti probinsiya.

Malagip a naalokaran ti pundo ti nadakamat a training nga umabot ti 325,875 pesos para ti ‘per diem’ wenu allowance ken hotel accommodation dagiti participante.

Gapu kadaytoy, imbatad ni Ilocos Norte SK Federated President Rafael Chua Medina a masapul a makitaan iti tunggal ili wenno siudad ti Financial Statement tunggal adda maangay a programa tapnu agtalinaed ti naurnos ken maibanag nga husto ti pundo, nga agpaay kadagiti agtutubo.

Bernard Ver, RMN News

Facebook Comments