Davao City – Ginasubay pa sa kapolisan sa Sta. Ana aron maidentipika ang pangalan sa tulo ka sakop sa Task Force Davao human giingong nanagpa sa usa ka estudyante ug usa ka minor de idad.
Kahinumdoman nga meriklamo sa Sta. Ana PNP ang usa ka Andrey Jiñoso, 18 anyos, estudyante ug residente sa 5th Ave., Brgy. Tomas Monte Verde, siyudad sa Davao.
Sumala pa iyang gireklamo ang tulo ka wala mailhing lalaki nga miyembro sa Task Force Davao.
Saysay sa complainant nga alas-7:45 sa gabie adlaw’ng Sabado nagsakay kini og traysikad padulong sa may Magsaysay Park aron mamalit og durian kauban ang duha ka minor de edad.
Sa dihang nanaug sa may dalang Alvarez duol sa may Magsaysay China Town, usa sa kauban sa tulo ka Task Force Davao ang hubog nga maoy migunit sa minor de edad nga si alyas Wacky ug gidala likod sa BFP dayon gisagpa.
Gisundan sa complainant og nangutana kun unsa ilang sala apan nasuko ang suspek ug gisipa hinuon tumong sa tiyan nga bahin.
Dugang pa nagmando ang suspek ngadto kang alyas Wacky nga sagpaon si Jiñoso ug kaubang minor nga si alyas Marko.
Daling nangayo og tabang ang complainant ngadto sa iyang mga silingan aron kuhaon ang duha ka minor de edad apan pagbalik gikasahan og armas sa tulo ka membro sa TF.
Human sa insidente daling nagpatabang sa kapolisan ang complainant ug mga kakauabanan niini samtang sa pagkakaron gina-ila pa sa kapolisan ang tulo ka mga sakop sa Task Force Davao aron hingpit nga mapasakahan og kaso.
RadyoMaN Don Pulayao
