Aurora, Zamboanga del Sur – Patay ang usa ka tindero human kini gipusil sa duha ka wala mailhing mga suspetsado alas 6 ang takna kagabie sa Purok Santo Niño, Brgy Libertad, Aurora, Zamboanga Del Sur.
Ang biktima mao si Jumary Romarate Mangubaty, 36 anyos, minyo, tindero ug residente sa Purok Santo Niño, Brgy Libertad, Aurora.
Sa imbestigasyon sa kapulisan sa Aurora nasayran nga samtang ang biktima anaa sa sulod sa iyang tindahan, duha ka wala mailhing mga lalaki ang miduol kaniya ug nagpakaaron-ingnon nga customer ug sa walay pag-ukon2, mipusil sa biktima sa makadaghang higayon.
Ang biktima nakaangkon ug upat ka samad pinusilan sa iyang dughan, tiyan ug too nga kamot ug dali kining gidala sa Aurora Community Emergency (ACE) Hospital, Brgy. Cabilinan, Aurora, apan gideklara kini sa doctor dead on arrival. Samtang ang mga suspetsado ang daling misibat sakay sa usa ka single motor paingon ngadto sa Brgy. Monte Alegre, Aurora, ning probinsya.
Nakuha sa dapit nahitabuan ang 1 ka 50 pesos, upat ka slug ug pito ka basiyo sa bala sa Calibre 45 nga pistola. Ang mga nakuhang butang ang giturn-over ngadto sa Zamboanga del Sur Provincial Crime Laboratory, Camp Abelon Pagadian City alang sa Ballistics Examination samtang padayun pa gihapon nga gisuta ang motibo sa maong pagpamusil.
