Pilason ang isa ka tiyo matapos ginbuno sang iya hinablos pasado alas 10 kagab-i (Marso 2) sa Barangau Agbao, Bingawan, Iloilo.
Kritikal ang kahimtangan sang biktima nga ginkilala kay Jomel Suarez, 42 anyos ang edad sang nasambit nga lugar matapos makaagum sang pilas sa tiyan tuga sang pagbuno.
Ginkilala naman ang suspek nga hinablos nga si Rubennito Diaz, 29 anyos sang amo man nga lugar.
Natigayon naman nga madakpan ang suspek sa follow up operation sang mga katapo sang Bingawan PNP kag yara na napriso sa Bingawan Police station.
Ginpahayag ni Police Master Sgt. Nanette Puasan, deputy chief of Police sang Bingawan PNP nga pareho nga nakainum ang biktima kag suspek kag papuli na sang matabu ang insidente.
Suno sa suspek nga ginsukot siya sang iya tiyo sang utang niya nga 500 pesos apang ginbayaran niya ini sang 200 pesos kag didto ginsumbag siya sini sa nawala nga dulunggan.
Bangud sini, iya nabun-an ang iya tiyo nga nakaagum sang pilas sa tiyan.
