TACLOBAN CITY – Nadakop na an suspek nga pumatay ha duha nga trabahante han lechon manokan store ha Brgy. 72 PHHC, Tacloban City nga nahinabo dida han September 12, 2018.
Dida han dominggo, January 6, 2019, ha bulig han Antipolo PNP, arestado na an suspek nga hi Lito Mabag Daguman Alyas “Lito Mabag Cabigayan”, 28 anyos, usa nga parag-uma ngan presente nga naka-ukoy ha Sitio Kaysakat, Brgy. San Jose Antipolo City, Rizal pero taga Brgy. Parasanon, Pinabacdao, Samar ini hiya.
Sumala han Tacloban City Police Office, ginkokonsidera ini nira nga Top 1 Most Wanted Person han syudad.
Basi ha report, ginpamatay han suspek hira Gino Sabaclin, 25 anyos ngan Ronnel Mendova, 20 anyos nga mga residente han Brgy. Hinuntad Basey, Samar ha sakob han lechon manokan samtang nangangaturog.
Aatubangon han suspek an 2 counts nga kaso han murder.
Ha pagka-yana, aada na ha kustodiya han Antipolo PNP an suspek.
Samtang, mayada pa usa nga suspek nga padayon nga ginbibiling han mga otoridad.
