Kumalarang, Zamboanga del Sur – NADAKPAN SA HINI-USANG PWERSA Kumalarang Municipal Police Station ug tropa sa Ozamis City Police Station ang Top 1 Most wanted Person sa lungsod sa Kumalarang atol sa gilusad nga Police Operation sa Port Road, Barangay Baybay Triunfo, Ozamis City.
Ang tropa sa Kumalarang PNP gipangunahan ni Police Captain Dexter Adrias, ang nakigkutay sa Ozamis PNP aron pagsikop sa target nga si Sergio Ramonal a.k.a. “Jun-Jun, 34-anyos, driver ug residente sa Barangay Diplo, Kumalarang, Zamboanga del Sur.
Ang akusado gidakop pinasikad sa gahom sa warrant of arrest sa patong-patong nga kasong Murder ug frustrated Murder nga gipagawas sa hawanan sa Ninth Judicial Region, RTC, Branch 21, Pagadian City.
Ang dinakpan kasamtangan nga gipaslak sa Ozamis City Police Station Lock-up cell samtang naghulat sa sunod nga lakang gikan sa mando sa korte.
