Top 6 most wanted person sa probinsya, nagbatu-patay sa pulis — subject, gunman sa pagpatay kay anay mayor Luis Mondia sang Pulupandan, Negros Occidental

DINGLE, Iloilo – Patay ang top 6 most wanted person sa probinsya sang Iloilo matapos nagbato sa kapulisan sang ginserbihan sang warrant of arrest sa iya puluy-an sa Barangay Tambunak, Dingle las 5:30 Miyerkules sang aga, Abril 24.

Suno kay Police Major Jonathan Pinuela, head sang Iloilo Police Provincial Office (IPPO) Special Operations Group (SOG), madanlog dakpon ang subject nga si Rammy Enojo kag maka-apat na nga ginpaidalum sa police operation antes nadakpan.

Mabudlay man magsulod sa ila lugar bangod may “look-out” kag lunsay pamilya sang subject ang ara sa palibot gani nagpakuno-kuno sila nga ma-deliver sang tubig.


Napilitan naman nga magpalupok ang operatiba suno kay Pinuela bangod sang macorner na sang kapulisan si Enojo, nagbunot ini sang .38 revolver apang wala naglupok kag nagku-ot pa gid sang granada sa iya bulsa.

Nahibaluan, si Rammy Enojo amo ang gunman sa pagpatay kay former mayor Luis Mondia sang Pulupandan Negros Occidental sang September 2010. Naggwa ang warrant batok sa iya sang 2012 kag halos 7 ka tuig na nga nagapanago sa ila lugar.

Suno kay Major Pinuela, naestorya niya ang kapitan sa barangay kag ginpahayag sang punong barangay nga gin-estorya man sini si Enojo apang ginsiling sang subject nga handa siya nga magtaya sang iya kabuhi kag indi ini magpadakop sa pulis.

“Biskan si kapitan naghambal nga he is willing to die, willing to kill kay indi siya ya magsurrender. Manginmatay gid siya ya kay may granada siya nga gina-uyatan, may armas siya,” ang kabahin sang pagpahayag ni Major Pinuela.

Si Enojo ang na-angot man sa crime, robbery kag drug group sa 3rd kag fourth district sang Iloilo nga Magno/Matillano group.

Narecover sang otoridad ang 1 ka unit sang hand grenade, 1 ka unit sang cal. 38 revolver kag 1 ka unit sang 12 gauge shotgun.

Facebook Comments