Tourist arrival sa syudad misaka

Davao City- Luyo sa mga hulga sa seguridad nga nadawat sa dakbayan, padayong misaka ang tourist arrivals dinhi sa syudad sa Dabaw.

Base sa datos, nakab-ot sa syudad ang 2 million tourist arrivals alang sa tuig 2017, bisan pa og gipailawom sa Martial Law ang tibuok Mindanao apil na dinhi ang Davao City.

Natala sa Davao City Tourism Operations Office nga adunay 2,009,879 ka mga turista ang miabot sa dakbayan gikan Enero ngadto Disyembre niadtong tuig 2017.


Sa maong record, 1.8M ang mga domestic tourists ang mibisita sa dakbayan ug misaka kini itandi sa tuig 2016 nga adunay natala nga 1.7M domestic tourists.

Ang maong pagsaka sa ihap sa mga turista nahitabo niadtong bulan sa Agosto diin gisaulog ang Kadayawan Festival.

Misaka usab ang ihap sa mga foreign tourists nga mianhi dinhi sa dakbayan diin natala nga alang sa tuig 2017 adunay 126, 209 ka mga langyaw ang mibisita sa syudad itandi sa 124, 863 ka mga foreign tourists arrivals niadtong tuig 2016.

Ang napulo ka mga foreign markets sa tuig 2017 mao ang musunod: USA, 20,779; Japan, 12,510; China, 9,231; Korea,7,550; Australia, 5,929; India, 4,976; Singapore, 4,040; Canada, 4,016; UK, 3,282; Saudi Arabia, 2,371.

Gawas niini, misaka usab ang ihap sa mga Balikbayan dinhi sa syudad gikan sa 23, 256 nga record niadtong tuig 2016 itandi sa 47, 872 nga ihap sa tuig 2017.

Subay niini, gipasalamatan ni Tourism Operations Office chief Generose Tecson ang lig-on nga partnership sa lokal nga panggamhanan ug local and private sector sa dakbyan nga matod pa niya maoy hinungdan sa pagsaka sa ihap sa mga turista nga nianhi sa Davao City.

Sa interview ni RadyoMaN Joel Viray sa programang Kolokabildo sa Radyo, giangkon ni Tecson nga sa unang implementasyon sa martial law mikunhod ang mga turista apan pag-abot sa buwan sa Hunyo subli mikusog ang turismo ug namalik ang mga dumuduong sa dakbayan.

Gilaraw ni Tecson nga malabwan pa ang gidaghan sa mga turista sa miaging tuig sulod karong tuiga busa gi-aghat sa opisyal ang mga Dabawenyo nga mutabang sa pagpromotar sa syudad.

“Kailangan natin ang tulong ng bawat Dabawenyo, mag post mo sa inyong mga social media accounts about how nice Davao is and invite your relatives and friends to visit Davao City,” segun ni Tecson.

RadyoMaN Joel Viray

Facebook Comments