BACOLOD CITY – Nagma-uy ang isa ka ginaalegar nga traffic enforcer kag nagpang-harass sang mga traysikad kag traysikol driver kaina sang kaagahon sa dalan Alunan-Araneta diri sa ciudad sang Bacolod.
Ginkilala ang suspek nga si Benigno Malacaw, legal ang edad, residente sang Brgy. 35 kag ginaalegar isa ka traffic enforcer.
Suno sa isa sa mga tagreklamo nga si Isaac Aceras, legal ang edad, pumuluyo man sang Brgy. 35 nga may mga las 4:30 kaina sang kaagahon, nag-abot ang suspek sa ila ginahamtangan sakay sa motor kag ini ang hubog.
Pahayag ni Aceras nga nakibot na lamang sila sang hinali na lamang nga nagmauy ang suspek, ginpangbungguan sila kag nagpang-harass ini. Sang ginsaway ang suspek, nag-waras pa gid ini kag nagsiling nga wala siya nahadlok madulaan sang trabaho.
Matapos nagmauy, dali-dali man nga nagpalagyo ang suspek gani nagpadulong na lamang sa police station ang mga biktima kag nagpa-blotter./dyHB BACOLOD
