LA CASTELLANA, NEGROS OCCIDENTAL – Natigayon na ma-intercept sang mga katapo sang La Castellana Police Station ang isa ka truck nga puno sang nagkalain lain nga sahi sang troso pasado las 8 kagab-i sa Sitio Old Pabrica, Brgy. Cabagnaan, La Castellana.
Nakilala ang driver sang truck na si Angelo Patricio Jr. 28 anyos, single kag residente sang Had. Remedios, Brgy. Balabag, La Carlota City kag ang iya helper na si Roderich Solis, 34 anyos, pumuluyo man sang amo nga lugar.
Suno sa La Castellana PNP nga nag-coordinate sa ila opisyal sang Mount Canlaon Natural Park nga si Noel Macado kag nag-inform nga may nakita nga truck nga puno sang kahoy halin sa Brgy. Masulog, Canlaon City padulong sa area sang La Castellana.
Bangud sini, gilayon nga nagpatigayon sang check-point ang pulis upod ang mga personnel sang CENRO Bago City sa Sitio Old Pabrica.
May mga las 8:50 na sang gab-i sang naglabay ang amo nga truck karga ang nagkalain lain nga sahi sang lumber nga wala sang nagakaigo nga dokumento.
Sa karon yara na sa kustodiya sang La Castellana MPS ang na intercept nga troso samtang gin release naman ang driver kag ang iya helper.
Ini nga kaso ginpaidalum na sa imbestigasyon kag dugang nga verification sang PENRO./Roselyn Borromeo photo/RMN
