BACOLOD CITY – Bangud sang kutso-kutso isa ka iloy ang ginkastigo sang isa ka lalaki kahapon sang hapon sa Brgy. 27, Bacolod City.
Ginkilala ang biktima nga si Joan, 58 anyos ang edad, pumuluyo sang amo nga barangay samtang ang suspek naman nakilala niya kay ‘Turing’.
Suno kay Joan nga mga las 4 kahapon sang hapon, naglalisay sila ni ‘Turing’ bangud sang mga duhol-duhol istorya ukon kutso kutso.
Sa tunga-tunga sang ila linalisay, ginpahayag ni Joan nga hinali na lamang siya nga ginkastigo sang suspek kag ginbunggo.
Nag-angkon sang pilas sa iya agtang kag duha ka kamot ang biktima subong man nagpalanakit ang iya kalawasan.
Bangud sini, gindala sa Corazon Locsin Montelibano Memorial Regional Hospital ang biktima kag padayon ini karon nga confined./
