Ta hace ahora embuscada el maga pulis con sinco maga persona quien reportaomente ya mata con un habal-habal driver na Upper Bunguiao del Lunes por la tarde.
Na report del pulis ya nombra con el victima como si Arnel Pantaleon y Alfaro, 38, de Upper Bunguiao.
Con el cuerpo di Pantaleon lleno de tajo ya recobri del Lunes tarde.
Asegun con el maga pariente di Pantaleon, ya anda le con el diila abuelo si Dunding Ferer na Malayal, Sibuco, Zamboanga del Norte de Lune saga y ya lleva cuantos comestibles.
Ala tarde del mismo dia, ya puede columbra con Pantaleon pabolbida ya na Bunguiao muntando consu motorsiclo pero nohay mas este llega na diila residencia hasta por ultimo ya encontra ya lang consu cuerpo ma sangre y puru tajo y sajada na su pescueso.
Ya puede tambien recobri el maga pulis con el motosiclo del victima y cuantos su maga personal cosas, un bala de armalite y el mismo bolo con baena serca na su cadaver.
Mientrastanto mismo el maga hermano del victima ya nombra con el maga suspechao como el tres man hermano, Martin, Marvin y Melvin Samonte y tiene pa sila dos compañero como el responsible na incidente. Asegun tiene deve el maga suspechao con el victima y del mas reciente ya tene estos argumento na cobrada del mencionao deve.
