Tsuper de tricycle yan jugete consu "raboy pagui" enfrente consu pasajero mujer, arestao

*Un tricycle driver ya sale arestao despues este ya man jugete consu “raboy pagui” na presencia del su pasajero mujer mientras ta corre el tricycle del Biernes tarde na Canelar.*
*Con el tsuper ya conose como si Jamil Aranain y Haruno, 34, ta queda na Tumaga y native del Bongao, Tawi-Tawi.*
*Asegun conel el pasajero un 19-anyo de edad estudianta, ya munta le na tricycle con placca numero JX 1582 ta maneja si Aranain desde na RT Lim Boulevard y manda le lleva na su dormitory na San Jose Cawa-Cawa para cambia su unporme y ya manda le espera con el mismo tricycle.*
*Asegun cuando ya munta otravez el dalaga con el mismo tricycle, ya manda le con Aranain lleva conele na un mall na Governor Camins Avenue pasando sila na Canelar.*
*Pero mientars ta biaja sila na calsada del Canelar Moret, ya espanta ya lang el dalaga cuando ya puede le mira si Aranain taman jugete ya consu “raboy pagui” amendiante ta maneja le conel tricycle.*
*Asegun el derecha mano di Aranain ta agara con el manibela del motorsiclo mientras su esquierda mano ta agara con otro manibela que es su “raboy pagui” y taman jugete ya mientras sabe le ta mira el disuyu pasajero dalaga.*
*Secretamente el dalaga ya man video con el cosa ta hace si Aranain usando su cell phone.*
*De llegar na barangay hall del Canelar, ya manda para el dalaga conel tricycle y ya pidi este ayuda con el maga duty barrio official mientras si Aranain ya escapa ya pero del Sabado ya puede siempre conele aresta y ya lleva na Tricycle Adjudication Board na City Hall despues ya entrega na pulis para el propio plantada de caso na corte.*

Facebook Comments