Tulo ka mga beach resort sa Gensan gi-warningan human wala mituman sa mga minimum health protocols

General Santos City–Mokabat sa tulo ka mga beach resort sa Gensan ang gipang-warningan ug gihatagan ug red certificate sa City Permits and Licensing Division human wala misunod sa mga minimum health protocols nga gimando sa gobyerno.
Pamahayag ni Geraldin Zamora, labaw sa maong buhatan nga sagad sa nasupak sa mga nahisgutan mao ang wala pagtuman sa social distancing, ug aduna pay mga kabataan nga nakasulod sa maong mga resort. Panawagan niini sa mga ginikanan nga dili ibutang sa risgo ang kinabuhi sa ilahang mga kabataan ug gawas niana, klaro sa guidelines sa national nga dili pa pwedeng mogawas ang mga kabataan 15 anyos paubos.
Dugang pamahayag ni Zamora nga sa karon, padayon gihapon ang ilahang paglibot sa tanang mga resort ug establishemento sa Gensan aron masegurong natuman ang EO 48. Samtang sa mga naunang establishmento nga ilahang gilibot milabayā€™ng semana, wala silay nahatagan ug red certificate kung asa kasagaran blue certificate ang nahatag gumikan adunay uban ang nagtuman sama sa facemask ug faceshield, apan ang implementasyon sa QR code, daghan matud pa ang wala nasayud.
Nauna na matud pa nilang gipasabot sa ubang estbalishemento nga dili na kinahanglan mupalit ug himan alang sa pag-scan sa QR code tungod pwede na kining himuon gamit ang mga android phone. Kinahanglan matud pa nga mas pahugtan nila ang implementasyon sa QR code alang sa mas paspas nga pagpahigayon ug contact tracing.
Panawagan nalang ni Zamora sa katawhan nga magtinabangay ang tanan gumikan dili lang kini para sa LGU kondili alang kini sa proteksyon sa katawhan. Pagpaklaro niya nga subay sa datus, mukabat sa 11 mil ka mga establishemento ang nahatagan ug business permit ug dili pa gyud tanan ang ilahang nalibot, wala pay labot niini ang mga negosyo nga wala narehistro.(LVR)

Facebook Comments