Davao City – Patay si Yang Yang Agad Panta, 27-anyos, samtang angol usab sila si Jayser Muntol, 19-anyos ug laing usa ka menor de edad human kini mibangga sa poste nahitabo alas-11:00 kagabii sa may Daliaon Plantation, Toril ning siyudad.
Base sa report, gikan sa Poblacion Toril ang mga biktima pauli sa Prk. 1, Daliaon Toril sakay sa usa ka single nga motorsiklo apan nakaligis kini og bato sa dalan hinungdan nga misarasay ug nawad-an sa kontrol ang motor gani mibangga kini sa poste.
Grabeng samad ug bun-og ang nahiaguman sa mga biktima ug napurohan ang driver niini nga si Panta kinsa gideklarang dead on arrival ngadto Malta Medical Center samtang gidala ang mga angkas niini sa Southern Philippines Medical Center (SPMC).
Basi sa imbestigasyon sa otoridad nga impluwensiyado sa bino ang mga biktima.
Sa pikas bahin, patay sab ang duha ka mga lalaki nga nakamotorsiklo human kini mibangga sa wing van alas-9:30 sa buntag niadtong adlaw’ng Dominggo sa Purok 7, Sityo Tag-uma, Barangay Pasian, Compostela Valley Province.
Mga biktima mao sila si Aurilio Bescadero, 17-anyos, nagmaneho sa Honda TMX sakay si Jonrie Camirino, pulos nagpuyo sa Purok 1, Barangay Lankilaan, Trento, Agusan Del Sur samtang gidrayban ni Malicor Tayco, 46-anyos, residente sa Barangay Poblacion, Barobo, Surigao Del Sur, ang maong wing van.
Sa imbestigasyon sa Monkayo Municipal Police Station-Traffic Section, parehong naglawig sa national highway ang duha ka mga behikulo sa managlahing direksyon apan pag-abot sa kurbada aksidenteng mi-overshoot ug mibangga sa wala nga bahin sa bumper sa wingvan ang motoriklo diin miresulta kini sa pagkabalintong.
Gisulayan pa og dala sa Compostela Valley Provincial Hospital – Montevista ang mga naangol apan deklaradong patay si Bescadero samtang gikustodiya sa maong police station ang driver sa wing van samtang nagpadayon pa ang imbestigasyon.
RadyoMaN Paul Canono, RadyoMaN Juls Catisay
