UN MIL FUERZA MAN DEPLOY EL POLICIA Y MILITAR LUEGO NA FIESTA PROCESSION

Preparao ya asegun el policia y militar aqui na Ciudad de Zamboanga por el conducta del Grand Fiesta Procession luego alas tres por la tarde.Hay alcansa na mas de un mil mga men in uniform desdel deferentes fuera del militar y policia junto con el barangay el con quien sila emplasta na ruta del prosisyon luego.
Na entrevista del RMN Zamboanga enantes aga na programa Alarma 900, el portavos del Zamboanga City Police Office Inspector Edwin Duco ya abla cay na lugar ya el preparasyon de seguridad y ya dividi sila na cuatro sector con el deployment del mga otoridad y omento del force multipliers que amo guardya y asegura el pacifico conducta del procession luego.
Chene tambien asegun mga intelligence operatives, bomb squad, paramedics y amulancia que parte del security contingent para asegura el buenamente actividad.
Apelo del policia con el publico para sugui con el mga de mas temprano reglamento que ta impone el policia na mga actividades del Zamboanga Hermosa Festival.
Hay curta tambien el cignal del mga cellular phones luego prinsipiando alas-tres hasta alas seiz del tarde y serra cuantos camino donde pasa el ruta del prosisyon.
– *Bhong Simbajon/RMN News*

Facebook Comments