Unom ka miyembro sa robbery gang nga nitulis sa 53-anyos nga negosyante, nakdakpan sa lungsod sa Bayog

Bayog, Zamboanga del Sur – Wala makapahimulos sa ilang bahin nga kwarta ang unom ka mga miyembro sa robbery gang nga maoy gitudlo nga responsable sa pagtulis sa 53-anyos nga negosyante human nadakpan sa follow operation sa militar ug kapulisan sa lungsod sa Bayog, Zamboanga del Sur.
Naimbargo sa otoridad gikan sa posisyon sa unom ka suspetsado ang kwarta nga tinulis diha sa Public Market sa Brgy. Poblacion lungsod sa Bayog atol sa pagharang gigamit nga gate-away vehicle sa mga suspek nga Toyota Fortuner nga nagtangag sa plaka numero MEM 239 color itom.
Base sa inisyal nga imbestigasyon alas 12:35 kagahapon sa udto dihang kalit nga nibutho sa tindahan ni Leonita Dela Cruz Bides, ang grupo ug largong gitiunan og armas ang biktima dungan ang pag-ilog sa sling bag nga gisudlan sa kwarta nga mobalor sa 100,000.
Dihang nakadawat og impormasyon ang kapulisan largo kining niresponde sa lugar ug pinaagi sa tabang sa mga nakasaksi sa hitabo natumbok ang sakyanan nga gigamit sa mga suspetsado ug atol sa operasyon naharang kini nga sakay ang mga suspek nga sila si Juvenard Benetara Lara, 30 -anyos, taga San Pedro Extention, Barangay Lagao, General Santos City ug Russel Mamac Gallemit, 58 -anyos, residente sa Purok Ferdinand, Sto. Niño District. Pagadian City.
Nakumpiska gikan kanila ang kwarta nga 43,780 usa ka pistola nga dunay usa ka magazine nga gipalamanan og pito ka buhing bala.
Pinaagi usab sa tabang sa 2nd Provincial Mobile Force Company ug 44th IB sa Philippine Army natumbok ang dapit nga gitaguan sa laing upat ka suspetsado partikyular sa Sitio Marao, Depase, Bayog.
Malampuson nga nadakpan sila si Roel Mamac Gallemit, 57 -anyos, lumulupyo sa Purok Ferdinand, Sto. Niño District, Pagadian, Jade Vargas Taginez, 26 -anyos, taga-Purok Pascual, Brgy. Rosary Heights, Cotabato City, Edwin Fernandez Tan, 34 -anyos, taga-Lake Sebu, South Cotabato ug Norman Nepumoceno Suson, 41 -anyos taga-Purok Ferdinand, Sto. Niño ning syudad.
Ang mga dinakpan nalumpong na karon sa bayog Municipal Police Station detention facility nga gitakdang pagakasohan karong adlawa.

Facebook Comments