UPDATE | Duha ka mga ten wheeler trucks, hungod nga ginsunog suno sa tag-iya; imbestigasyon sang mga kapulisan, nagapadayon

Roxas City, Capiz – Nagapadayon sa gihapon ang imbestigasyon sang mga kapulisan angut sa pagkasunog sang duha ka ten wheeler trucks sa separado nga lugar sa diri sa probinsya sang Capiz. Una nga nasunog ang nagaparking nga ten wheeler truck sa Barangay Agkilo, Panit-an, Capiz pasado alas dose kaina sang kaagahon. Madasig naman nga napalong ang kalayo, sa bulig sang mga residente sa nasambit nga lugar.
Ginsundan pa gid ini sang pagkasunog sang ten wheeler truck sa Barangay Bolo, Roxas City nga lunsay tanan ginapang-iyahan ni Myla Muyco sang MBM Construction. Sa exclusive interview sang DYVR RMN Roxas sa tag-iya, nagapati ini nga hungod nga ginsunog ang iya mga truck apang wala sini mahibaluan ang kun sin-o ang responsable. Suno pa diri nga ginatugyan na niya sa mga otoridad kag labi sa tanan sa Ginoo ang nasambit nga butang agud mahibaluan ang yara sa likog sang pagsabotahe sa iya negosyo.
Gindugang man ni Muyco nga magapadayon sa gihapon ang iya negosyo apisar sang pagkasunog sang iya mga truck nga nagtuga sang dako kag milyon nga kahalitan bangud madamo sang madulaan sang trabaho sa ti-on nga mag-untat ang iya negosyo. Sa madumduman nga isa man ka heavy equipment ukon road grader ang ginsunog sang mga wala pa matumod nga mga suspek sa Barangay Mianay, Sigma, Capiz nga ginapanag-iyahan man sang isa ka construction firm.

<#m_-3490776679819240513_DAB4FAD8-2DD7-40BB-A1B8-4E2AA1F9FDF2>

Facebook Comments