USA KA TUIG NG LSI, PINAKABATA NGA NATAPTAN OG COVID SA OROQUIETA CITY

20

Nagpangidaron og usa ka tuig ang pinakabata nga kumpirmadong nag-positibo sa COVID-19 sa Oroquieta City, nga taga-Barangay Lower Lamac, hangtud kagahapong adlawa.

 Usa kini ka locally-stranded individual o LSI.
 
Sa report sa inter agency task force on COVID-19 sa siyudad, naka-uli ang bata kauban ang iyang mga ginikanan ug apuhang babaye gikan sa kauluhan, niadtong Oktubre 1, sakay sa Cebu Pacific, nga mitugpa sa Ozamiz City airport.

 Nag-reactive o nag-positibo sa IgG ug IgM antibodies ang bata, ang iyang amahan ug apuhan sa rapid diagnostic test busa gidala sila sa MOAP isolation facility apan ang inahan gidala sa Project Haven quarantine facility tungod kay non-reactive o negatibo kini sa RDT.

 Niadtong Oktubre 5, dungan nga gipailawom silang upat sa RT-PCR test ug Oktubre 9, migawas ang resulta nga positibo sa virus ang bata, ang iyang amahan ug ang apuhan.

 Gi-tag nga case number 33 ang bata, ang iyang 27 anyos nga amahan case 32 ug iyang 63 anyos nga apuhan case 34.
 
Ang RT-PCR test result sa inahan, nga positibo usab, migawas Oktubre 10, ug mao kini ang case 38 sa Oroquieta.

 Sa kasamtangan, miabot na sa 49 ang nakumpirmang kaso sa siyudad, apan 25 na lang ang aktibo human maka-recover ang 23. Adunay usa ka namatay sa Oroquieta nga opisyal sa usa ka ahensiya sa gobyerno.

Facebook Comments