Ginganlan na sa kapulisan sa Misamis Oriental ang usa sa tulo ka suspek sa pagpanulis sa negosyante niadtong Biyernes sa hapon sa merkado sa Gingoog City.
Ang suspek mao ang 39 anyos nga si Jefrey Collantes Cañete nga taga El Nido, Palawan.
Nasikop si Cañete sa kapulisan sa Gingoog City niadtong Sabado sa buntag sa National Highway, Barangay Santiago, Magsaysay, Misamis Oriental.
Ang suspek positibong gitudlo sa biktimang negosyante nga si Renante Noculan, 42 anyos ug taga Purok 1, Barangay Kibungsod, Magsaysay, Misamis Oriental.
Matud ni Police Sr. Insp. Arlyne Ranario, Public Information Officer sa Misamis Oriental Police Provincial Office nga nasakay sa biktima sa bus ang suspek niadtong Sababo gikan sa Magsaysay paingon sa Gingoog City busa nagpakitabang kini sa kapulisan.
Gidugang ni Ranario nga mikabat sa halos 400-mil pesos (386-thousand pesos) ang nadala sa tulo ka mga suspek diin ang duha padayon pang gipangita sa kapulisan.
Armado usab sa kalibre .45 armas ang mga suspek ug sakay sa motorsiklo sa dihang gihimo ang pagpanulis.
