‘Uso-uso’ monitoring gi-intensify dinhi

Davao City- Subay sa padayong pag-monitor ngadto sa mga pampublikong sakyanan dinhi sa dakbayan, nagpahigayon og random checkpoint ang Davao City Police Office (DCPO) Traffic Group sa may Catalunan Pequeño Davao- Bukidnon Road area kaganinang alas-10:00 sa buntag.

Sa maong checkpoint, usa ka driver nadakpan gumikan sa paggunti ug expired temporary operators permit.
Matod ni PO3 Alfredo Celis Jr, team leader sa gikasang random checkpoint, gikinahanglan kanunay magiyahan ang mga driver nga kumpletuhon ang ilang mga papeles una mag-drive ingon man permanentehon ang pagsunod sa tanang mga balaud-trapiko.

“So far sa among pag random checkpoint diri sa may Pequeño, almost tanan rehistrado ang mga sakyanan, gina aware pud namo ang mga driver nga mag slow down sila para dili sila maka violate sa atong city ordinance nga speed limit.”


Dugang ni Celis, dili lamang mga ‘uso-uso’ drivers ang ilang ginapangdakop sa maong area apan apil na usab ang uban pang malapason nga mga PUJ drivers.

“Naga conduct gyod mi og time-to-time random checkpoint sa different places sa Davao City para ma aware sila nga ang pulis ready gyod alyways nga kung mo-violate sila og balaod dakpon gyod sila para ma prevent nato ang disgrasya,” segun ni Celis.

Panawagan niya ngadto sa publiko nga mag-igmat kanunay sa pagmaneho sa ilang mga sakyanan ug kung aduna man kiniy namatikdang mga malapasong drivers, i-report gilayon kini sa kapulisan aron dili pamarisan sa uban.

RadyoMan Abi Bibera

Facebook Comments