Nanghinaot si bise-presidente Leni Robredo nga dili na mausab ang gihimong pagpahubo sa mga inmates sa Cebu Provincial Detention and Rehabilitation Center (CPDRC), atol sa gihimong greyhound operation sa Philippine Drug Enforcement Agency (PDEA)-7 niadtong Martes sa kadlawon.
Alang kang Robredo, dunay nahitabong paglapas sa tawhanong katungod sa mga piniriso atol sa surprised inspection sa prisohan.
Matod niini nga nakuratan siya sa maong report, human usab nga nag-viral ang hulagway sa mga inmates nga hubo og naglinya sud sa prisohan diin ang Amnesty International namahayag nga dili tawhanon ang gihimong pagtratar sa mga piniriso.
Suma ni Robredo, kalapasan sa Anti-Torture Act ang gihimong pagpahubo sa mga inmates.
Dugang niini nga dunay laing pamaagi nga mahimong buhaton sa PDEA-7 sa pagpahigayon ug greyhound operation, aron makuha ang mga kontrabando sud sa prisohan ug dili kinahanglan nga pahubuon ang mga piniriso.
Miduaw sa Sugbo si Robredo, aron sa pagtambong sa pipila ka mga kalihukan.
Facebook Comments
