VM Reyes: NORDECO angay na nga wad-an og franchise sa Samal

Davao City – Buot karon ni Island Garden City of Samal (IGaCoS) Vice Mayor Lemuel “Toto” Reyes nga tanggalan na sa hingpit og franchise ang Northern Davao Electric Cooperative (NORDECO) tungod sa dili maayong serbisyo niini sa isla.
Kini ang gisulti sa bise alkalde karon nga nagpadayon ang Senate hearing tungod sa power interruptions sa syudad nga nakaapekto na sa mga residente ilabi na sa mga negosyante.
Sa interbyu sa DXDC RMN Davao kang Vice Mayor Reyes, gisulti niini nga unta kini ang madesisyonan ugaling dili kini mahatagan og long term solution sa maong kooperativa.
“Ang amoa gyong gusto mawalaan na gyud og franchise ang NORDECO. Kung naa ka sa Davao, imong tan-awon ang among isla, gabalhin-balhin ang kuryente. Kini nga barangay pasigahon. Palongon ‘tong pila ka barangay kay 3 megawatts nalang ang naga-anda sa ilang gen set. Unya ang among kinahanglan diri nga load is 9 megawatts,” sulti sa bise mayor.
Atol sa Senate hearing, gipasalig sa NORDECO nga masolusyonan ang kasamtangang problema diin sa Biyernes, Mayo 26, 2023 muabot ang dugang 2-megawatt generator sets isip temporaryong solusyon sa problema sa kuryente.
Dugang sa electric cooperative nga magsilbi usab nga long-term solution ang Pantukan – Samal Grid connectivity nga mahuman sa Hunyo 30, 2023.

RadyoMaN Kirby Manzon

Facebook Comments