WALA GINYANGGAW | 18 anyos nga biktima, napatay bangud sa Asphyxia due to aspiration – PNP Crime Laboratory

Cuartero, Capiz – Wala nagapati si Police Major Dr. Joe Martin Fuentes, medico legal officer sang Regional Crime Laboratory nga napatay nga soltero bangud ginyanggaw sang kaugalingon sini nga tiyo sa Barangay Balingasag, Cuartero, Capiz.
Ginpahayag ni Fuentes nga Asphyxia due to aspiration ang resulta sang ginpatigayon sini nga autopsy sa bangkay ni Aljohn Apoldo.
Suno pa kay Major Fuentes, nga may nakita ini nga foreign object nga nagsulod sa baga kag airways ukon alagyan sang hangin sang biktima nga amo naman gintunaan sang pagkapatay sini.
Nagaguwa man nga pwersahan nga ginpainum ukon ginpakaon ang biktima rasun nga may nagtalang nga object kag likido sa alagyan sang hangin padulong sa baga.
Natalupangdan man nga may bagras sa lawas kag nagdusngal ang bibig sang biktima nga si Aljohn Apoldo kun sa diin nagapakita lamang nga ginpilit kag ginpugong ini kadungan sang pagpainum sang ginhalo nga sangkap kag mga panakot.
Ginkumpirmar pa gid ni Fuentes nga na-admit sa ospital si Apoldo kag nagpaidalum sa psychiatric help matapos nga sunod-sunod nga napatay ang iya ginikanan kun sa diin indi malayo nga nag-angkon ini sang depresyon.
Pinaagi sa resulta sang autopsy, mahimo na nga matinluan ang pangalan ni Kagawad Roger Agustin (tiyo sang biktima) nga una gin-alegar nga nagyanggaw sa biktima.
Sa madumduman nga napatay ang biktima matapos ginpainum sang suspek nga sini Reggie Agustin sang ginhalo nga langgaw, tuyo, dulaw,badyawan,calamansi, asin kag madamo pa bangud sa pagpati nga gin-aswang ukon ginyanggaw ini.

Facebook Comments