WALA SANG KALUOY! | Patay nga lapsag, ginhaboy sa basurahan sa syudad sang Roxas

1569

Roxas City, Capiz – Nasapwan sang mga trabahador sang Roxas City Sanitary Landfill sa Barangay San Jose, Roxas City ang isa ka patay nga lapsag nga lalaki mga 10:30 kaina sang aga. Nakasulod ini sa isa ka plastic nga nagaduag sang green sang makita nanday Nito Borbon kag Arnel Patricio samtang naga-segregate ang mga ini sang basura.
Suno kay Patricio nga nakibot sila sang tumampad sa ila ang isa ka lapsag nga wala na sang kabuhi sang ginbukad sang mga ini ang plastic. Ginpahayag man ni Borbon nga kompleto na ang parti sang lawas sang amo lapsag nga ginabulubanta nga yara sa 5 tubtub 7 ka bulan ang edad.
Yara pa ang pusod sang amo nga lapsag kag may mga dugo pa sa sulod sang plastic. Nagikan ang amo nga plastic sa mga basura nga gin-ula sang truck nagikan sa mga kabaragayan sang syudad sang Roxas.
Posible nga ginpahulog ang amo nga lapsag sang wala sini kaluoy nga iloy kagab-i kag ginhaboy na lang sa basurahan. Gilayon naman nga ginpahibalo sang mga nakakita ang talatapan ni Punong Barangay Jericho Celino kag nagresponde man ang mga katapo sang kapulisan.
Sa karon yara na sa kustodiya sang Roxas City PNP ang nasambit nga lapsag kag posible natalana nga iga-turn-over sa CSWDO agud mapalubong ang amo nga anghel.

Facebook Comments