WALO, PILASON SA VEHICULAR ACCIDENT SA BAROTAC VIEJO NGA GINA-ULAMIRAN SANG TRUCK SANG PHILIPPINE ARMY.

Walo ka tawo ang pilason lakip ang tatlo ka katapo sang Philippine army matapos maulamid saa vehicular accident ang truck sang Philippine Army mga alas 2:10 kaina sang hapon sa Sitio Lunok, Barangay San Juan, Barotac Viejo, Iloilo.
Gikilala ang mga biktima nga sanday Corporal Crisniel Berong, 28 anyos; Corporal Ramie Villacampa, 27 anyos; kag Private Gremar Dialino, 22 anyos, lunsay miyembro sang Philippine Army kag assigned sa 55th 2nd Engineering Construction Battalion nga nakabase sa Dingle, Iloilo.
Pilason man sanday Darla Angela Baldonado, 23 anyos; Ma. Rhea Baldonado, 45 anyos; Reyman Estates kag Emmanuel De Castro, lunsay mga volunteers sa relief giving operation sa Balasan, Iloilo kag si Rene Sampani, 36 anyos sang barangay Puerto Princesa, Barotac Viejo, driver sang nakabunggo nga Ford fiesta.
Sa interview sang RMN Iloilo, ginpahayag ni PFC Jasper Laolao, driver sang six-wheeler truck sang Philippine army nga pabalik na sila sa banwa sang Dingle matapos magdul-ong sang relief goods sa banwa sang Balasan nga naapektuhan sang bagyo Ursula apang pag-abot nila sa kurbada nga bahin sang Sitio Lunok, Barangay San Juan, Barotac Viejo, nakabunggo sa likod nga bahin sang ila truck ang itum nga Ford Fiesta nga ginamaneho ni Sampani.
Bangud sini, nagbalang-balang ang Ford Fiesta kabangdanan nga napilasan ang driver sini nga si Rene Sampani samtang ang truck sang Army ang nagtakilid kag nagbalabag sa dalan resulta sang pagkapilas sang nasambit nga mga biktima.
Nahibaluan nga kaupod ni Rene Sampani ang iya asawa nga si Janice Sampani, kag bata nga si Jared Sampani kag duha pa ka iban.

Facebook Comments