Dipolog City – Nadakpan sa mga otoridad ang usa ka gipangita nga lalaki pinaagi sa warrant of arrest human nagpahigayon og operasiyon kagahapon alas 2:50 sa hapon diha sa Purok Pag-asa, barangay Barra ning dakbayan sa Dipolog.
Naila ang suspek nga mao si Rige Tadle, alias Micheal Amper 32 anyos, nga lumulupyo sa nahisgutang dapit.
Sa nahipos nga impormasiyon gikan sa Dipolog PNP, nasayran nga nagpahigayon ang tinugyanan gikan sa Intelligence Operatives sa pagpanguna ni Police Officer 2 Ronald Wapelle ug operasiyon kalabot na sa maong wanted person, hinungdan nga malampuson nila kining nasikop diha mismo sa pinuy-anan niini sa nahisgutang dapit.
Nasayran nga adunay kasong Attempted Homicide ang nahisgutang suspetsado human giisyu sa presiding judge nga si Chad Martin Paler.
Ang maong kaso adunay criminal case number nga A-52894 sa Regional Trial Court 9th Judicial Region, Branch 1 Dipolog City.
Sa karon, ang maong suspetsado ang kasamtangang gipriso sa selda sa Dipolog pnp ug gimadoan sa korte nga piyansa balor 12 ka pesos kon gusto niining makabaton sa temporayong kagawasan. (-r.m-)
