GENERAL SANTOS CITY- Napatay sa kapolisan sa Sultan Kudarat ang suspek nga gikaingon gapanghasi pinaagi sa pagti-on og armas ngadto sa mga barangay officials og tanod nga anaa sa checkpoint gumikan sa Enhanced Community Quarantine human nakigpinusilay niaging Martes sa buntag.
Sa report gikan sa Police Regional Office 12, giila ang suspek sa pangalang Eddie “Boy” Linas, maoy suspek sa pagpatay sa kanhing barangay kagawad sa Barangay Salumping, Esperanza, Sultan Kudarat niadtong Disyembre 2019.
Nasayran sa imbestigasyon sa kapolisan, alas-12:30 sa tungang gabie Martes nakigpinusilay og napatay ang suspek ngadto sa kapolisan kansang moaresto unta kaniya sulod sa iyang panimalay sa Sitio Cocoon sa maong lugar.
Una pa sa maong panghitabo, nakadawat og impormasyon ang kapolisan sa presensya ni Linas kauban ang magsuon nga silang Rene Boy Baltar ug Allan Baltar na armado og nanghasi mamusil og barangay officials og tanod sa ilang lugar gumikan sa hugot nga gipatumang curfew hours ug uban pang quarantine protocols.
Giakusahan usab ang mga suspek nga wala garespeto sa otoridad sa barangay og ginasupak ang tanang quarantine rules sa ilang lugar dayon ginahulang patyon ang kinsa mang mobabag sa ilang mga aksyon.
Miresponde matod pa ang mga sakop sa Esperanza Municipal Police Station sa maong reklamo og gituktok ang panimalay ni Linas pipila ka higayon og gitambagan nga motahan na malinawon.
Gipaarakan hinuon sa suspek ang mga kapolisan hinungdan mibalos og pamusil ang mga pulis nga gikamatay on-the-spot ni Linas.
Narekober sa balay sa suspek ang bali-bali na may bala sa 12-gauge shotgun, duha ka bala sa 5.56 cartridges, duha ka jolen gun, upat ka hinagiban ug dahong laya sa marijuana.
Hinapos nga pahayag ni Corpus, ang suspek wanted na sa kasong murder sa kanhing kagawad nga si Danny Arzadon kansa ang lawas gihagbong sa bangag nga 20-feet ang gilawmon aron matago ang ilang krimen nga nahimo.
For more info’s and updates, like and share our official facebook account : www.facebook.com/ifm91.9Gensanofficial/
[image: gipusil.jpg]
