Luwas sa katalagman ang driver kag helper sang nagbalintong nga wing van nga kargado sang thinner kag pinta sa bahin sang Gensan Drive partikular na sa atubang sang city hall sang Koronadal, alas 8:25 kahapon nga adlaw Mayo 21, 2020.
Ginkilala ang driver kay Alex Masalde, 46-anyos, residente sang Davao City kag Charles Espartero, 36-anyos, residente sang Lagao, General Santos City.
Sa imbestigasyon sang Koronadal City Traffic Office base naman sa pahayag sang driver nadulaan sang preno ang wing van nga may plate number ABK 8635 kag ginlikawan sini ang duha ka mga motorsiklo.
Nahibaluan nga sang Miyerkules nga adlaw Mayo 20, 2020 isa man ka fish car ang nahulog sa bangin sa Purok Maharlika, Brgy. Saravia, Koronadal City sa diin patay ang driver kag helper sang nasambit nga salakyan.
