Wiretap sa kuryente rason sa Cabantian fire

35

Davao City – Naabtan pa sa DXDC News Team ang usa ka mamakalay nga busy sa pagkarga sa puthaw ug sin sa iyang tricycle nga nakuha gikan sa na-ugdaw nga mga balay sa Cabantian, Buhangin ning syudad.

Ang nasangpit nga mga puthaw ug mga sin gidaginot sa mga nasunogan aron makwartahan ug aron duna silay magamit sa evacuation center sa Cabantian Gym kung asa sila temporaryo nagpasilong.

Dili na ma-itsura ang motor ni Helvin Reyes human naapil og kasunog samtang nagparada gawas sa balay gahapon adlawa apan maayo na lang kay wala mahurot og kasunog ang rehistro ug ang iyang SSS.

Gikaproblema karon ni Helvin kung unsaon niya pag-adto sa mga lugar kung asa siya nangkontrata alang sa iyang panginabuhi karon nga wala na kini magamit pa nga motor sa pagbiyahe.

Wala pa’y usa ka semana sukad nataod ni Bobby Cuison ang Christmas lights sa iyang panimay nga maoy nagpahayag sa ispiritu sa kapaskuhan sa ilang pamilya.

Posibli sa evacuation center na magselebrar sa pasko sa Disyembre 25 ang pamilyang Cuison human nga naapil og ka-ugdaw ang ilang balay lakip na ang mga kabtangan tungod sa kalit nga panghitabo.

Gimahay ni Cuison ang wala niya nganli nga residente gumikan sa pagtapping og lilnya sa kuryente sa silingan hinungdan sa pag-ulbo sa kalayo nga paspas mikanat sa kasigbit nga mga balay.

Apan padayon pa gisuta sa Bureau Fire Protection 11 ang tinubdan sa sunog nga miabo og siyam ka balay ug usa ang partially damage diin dili pa sab makumpirma ang kinatibuk-ang damyos sa insidente.

Miapelar ang 15 ka pamilya sa lokal nga panggamhanan nga matabangan sila sa pinansiyal nga aspeto aron aduna silay magamit sa pagpatukod pag-usab sa ilang mga balay.

RadyoMaN Joel Viray

Facebook Comments