Sarangani Province—Gikumpirma karon ni Rafael Abrogar, ang regional director sa TESDA Region 12 nga nakatakdang pagatukuron sa Sarangani Province ang usa ka world-class nga TESDA Regional Training Center mukantidad og P150 Milyones ka pesos. Bunga matud pa ang maong proyekto sa lig-on nga pagtinabangay nila Senador Manny Pacquiao, Congressman Ruel Pacquiao og Governor Steve Chiongbian Solon. Lauman nga sugdan kini pagpabarog sunod tuig 2019. Makita sa sulod ang admin building, assessment area, training hall, og ang dormitoryo kapuy-an sa mga buot mupailalum sa libre nga TESDA skills training.
Walay laing katuyuan ang TESDA kundili nga ipadangat ngadto sa mga yanong lungsuranon ang libreng pagbansay sa mga buot makatuon sa technical education og skills development.
Gani, bag-uhay lang nakadawat og Mobile Training Laboratory ang Sarangani Province gikan sa TESDA. Sa entiro Region 12, North Cotabato og Sarangani lang ang natagaan og Mobile Training Laboratory nibalor ang matag laboratory og P4 Milyones ka pesos. Direkta na unyang muadto ang mga personahe ngadto sa mga munisipyo og barangay aron magpahigayon og libreng training. Pwedeng kasudlan ang small engine repair, appliance repair, electrical installation, plumbing, bread and pastry, og cookery.
Kining tanan ang dakong gipasalamatan ni Governor Solon. Ongoing ang pagpatindog sa Sarangani sa Regional Drug Rehabilitation Center og sa Regional Sports Complex, og sa dili madugay sugdan napud pag-konstrak ang Regional TESDA Training Center.
