‎𝗗𝗔𝗧𝗜𝗡𝗚 𝗣𝗔𝗡𝗚𝗨𝗟𝗢𝗡𝗚 𝗬𝗢𝗢𝗡 𝗦𝗨𝗞 𝗬𝗘𝗢𝗟, 𝗣𝗜𝗡𝗔𝗧𝗔𝗪𝗔𝗡 𝗡𝗚 𝗛𝗔𝗕𝗔𝗡𝗚𝗕𝗨𝗛𝗔𝗬 𝗡𝗔 𝗣𝗔𝗚𝗞𝗔𝗞𝗔𝗞𝗨𝗟𝗢𝗡𝗚

‎Cauayan City – Guilty sa kasong insurrection ang dating Pangulo ng South Korea na si Yoon Suk Yeol matapos ang desisyon ng Seoul Central District Court kaugnay ng kanyang pagdedeklara ng martial law noong Disyembre 3, 2024 dahilan upang patawan siya ng life imprisonment o habangbuhay na pagkakakulong.
‎
‎Napatunayan ng korte na ipinakilos niya ang militar at pulisya upang sakupin ang National Assembly at ipahuli ang ilang opisyal.
‎
‎Ayon sa hukuman, ang pagpapadala ng mga tropa sa lehislatura ay maituturing na pag-aaklas at paglabag sa konstitusyon. Hindi rin umano sapat na dahilan ang umiiral na sigalot sa pagitan ng administrasyon at oposisyon upang magdeklara ng martial law.
‎
‎Agad na dinala si Yoon sa Seoul Detention Center matapos ang hatol at mananatili roon habang nakabinbin ang posibleng apela. Maaari pang umabot ang kaso sa Seoul High Court at sa Korte Suprema.
‎
‎Bagama’t hiniling ng prosecution ang parusang kamatayan, habambuhay na pagkabilanggo ang ipinataw sa insurrection case.

May iba pa siyang kinahaharap na kaso, kabilang ang abuso sa kapangyarihan, at nauna na rin siyang nahatulan ng limang taong kulong dahil sa pagharang sa kanyang pag-aresto.

————————————–

‎Para sa update at iba pang mga balita, bisitahin ang aming facebook page 98.5 iFM Cauayan at ang aming website, www.rmn.ph/985ifmcauayan.

‎#985ifmcauayan
‎#idol
‎#numberone
‎#ifmnewscauayan