𝟮 𝗖𝗔𝗚𝗔𝗬𝗔𝗡𝗢, 𝗡𝗔𝗚-𝗨𝗪𝗜 𝗡𝗚 𝗠𝗘𝗗𝗔𝗟𝗬𝗔 𝗦𝗔 𝗜𝗡𝗧𝗘𝗥𝗡𝗔𝗧𝗜𝗢𝗡𝗔𝗟 𝗦𝗖𝗜𝗘𝗡𝗖𝗘 𝗔𝗧 𝗠𝗔𝗧𝗛𝗘𝗠𝗔𝗧𝗜𝗖𝗦 𝗢𝗟𝗬𝗠𝗣𝗜𝗔𝗗 𝗖𝗢𝗠𝗣𝗘𝗧𝗜𝗧𝗜𝗢𝗡 𝗦𝗔 𝗝𝗔𝗣𝗔𝗡

Cauayan City – Muling nagbigay-karangalan sa lalawigan ng Cagayan ang dalawang kabataang Cagayano matapos silang mag-uwi ng mga medalya sa International Science Olympiad Competition of Southeast Asia (ISOCSEA) at International Mathematics Olympiad Competition of Southeast Asia (IMOCSEA) sa Osaka, Japan.

Nakamit ni Marquee Decena, tubong Enrile at kinatawan ng University of Saint Louis–Tuguegarao, ang Bronze Medal sa ISOCSEA matapos makipagsabayan sa mga kalahok mula sa iba’t ibang bansa sa Timog-Silangang Asya.

Samantala, mas doble ang karangalang iniuwi ni Lance Derald Pineda Auingan, tubong Aparri at kinatawan ng Lyceum of Aparri. Siya ay nagwagi ng Silver Medal (Top 7) sa ISOCSEA at Bronze Medal naman sa IMOCSEA.

Nakipagtagisan ng talino ang dalawang Cagayano sa mga estudyante mula sa Malaysia, Indonesia, India, Mongolia, Bulgaria, Thailand, Vietnam, at Bangladesh, kung saan kanilang ipinamalas ang husay at talino sa larangan ng agham at matematika.

Patuloy ang paghakot ng parangal ng mga kabataang Cagayano sa mga internasyonal na kompetisyon, patunay na kayang makipagsabayan ng talino at galing ng mga taga-Cagayan sa pandaigdigang entablado.