Mahigpit na binabantayan ngayon ng Pangasinan Provincial Disaster Risk Reduction and Management Office o PDRRMO ang Agno River kasama na ang tributaries nito dahil sa posibleng pagtaas ng tubig sa ilog.
Ayon sa tanggapan nasa 143, 118 estimated population sa probinsiya ang maaring makaranas ng pagbaha base sa 100-meter danger zone o 100-meter na pag-apaw ng tubig magmula sa ilog.
Ang naturang bilang ng populasyon ay mula sa 24 na bayan at 331 na barangay sa lalawigan. Kabilang sa mga bayan na maaring magkaroon ng pagbaha ay ang Aguilar, Bugallon, Labrador, Lingayen, Mangatarem, Urbiztondo, Binmaley, Aguilar, Bayambang, San Carlos City, Dagupan City, Alcala, Bautista, Sto. Tomas, Villasis, Asingan, Rosales, San Nicolas, Sta. Maria, San Manuel, Natividad, Tayug, Balungao, Rosales at San Quintin.
Dahil dito, nagpaalala ang tanggapan sa mga residente sa nabanggit na lugar na maging mapagmatyag sa oras na makapagtala ng pagtaas ng tubig sa naturang ilog.
Hinikayat rin ang mga ito na sumunod sa abiso ng lokal na pamahalaan para sa paghahanda at paglikas kung kinakailangan. |𝙞𝙛𝙢𝙣𝙚𝙬𝙨
