CAUAYAN CITY- Isang biyaya kung ituring ng mga residente ng riverside ang konstruksyon ng tulay sa bahagi ng Brgy. Gucab, Echague, Isabela.
Sa panayam ng IFM News Team kay Ernesto Ibarra, Punong Barangay ng Dammang East, malaking tulong sa kanila ang nasabing tulay dahil mapapabilis nito ang transportasyon ng mga residente lalo na sa pagbyahe ng mga kalakal ng mga local farmers.
Aniya, bukod sa mga residente ng Echague ay makikinabang rin sa proyekto ang mga residente ng Jones, Isabela.
Dagdag pa niya, sa pamamagitan nito ay hindi na kinakailangan pang umikot ng mga residente sa bayan ng Jones upang makarating lamang sa Centro.
Samantala, malaking pasasalamat ni Kapitan Ibarra sa Lokal na Pamahalaan ng Echague sa proyektong ito dahil mapapabilis at mapapagaan ang kanilang pamumuhay.
