Muling nadagdagan ang mga lugar at taniman na lubhang naapektuhan ng nararanasang El Niño Phenomenon sa bayan ng Tayug, Pangasinan.
Sa ibinahaging datos ng Municipal Agriculture Office sa IFM News Dagupan umakyat na sa 55.53 na ektaryang taniman ang lubhang naapektuhan ng epekto ng El Nino.
Ayon kay Elvie Moreno ang Municipal Agriculturist ng Tayug ay 100% nang damaged ang mga lugar o Barangay ng Evangelista, Libertad, Panganiban at Poblacion 6 habang ang Barangay Magallanes ay may ilang sakahan na rin ang apektado rito kung saan nasa 46 na magsasaka ang naapektuhan na karamihan sa kanila ay hindi naka-ensure o hindi rehistrado ang kanilang mga pananim sa PCIC o Philippine Crop Insurance Corporation.
Dagdag pa ng opisyal na karamihan sa mga lubhang naapektuhan ay ang mga inbred na pananim at may hybrid na pananim na rin ang naitala.
Nangako naman ang opisyal na gagawa sila ng paraan upang mabigyan ng tulong at solusyon ang mga problema ngayon ng mga magsasaka sa bayan. |𝙞𝙛𝙢𝙣𝙚𝙬𝙨
