Hinimok ni Archdiocese of Lingayen-Dagupan Archbishop Socrates Villegas ang lahat ng mananampalatayang Katoliko na magdasal ng rosaryo araw-araw na siyang daan upang labanan ang agresibong hakbang China sa West Philippine Sea.
Sa inupload na video sa facebook page ni Villegas, dapat umanong buksan ang mata, isip at puso dahil mayroong hindi magandang nangyayari sa paligid.
Aniya, ang mga mangingisda sa West Philippine Sea itinataboy at ang mga sundalo ng bansa ay ayaw palapitin upang magdala ng pagkain.
Dapat umano itong labanan sa pamamagitan ng Diyos at pagdarasal ng rosaryo araw-araw at hindi sa pamamagitan ng bala at kanyon.
Binigyang diin nito na ang rosaryo ang daan upang magbago ang loob ng China sa pagkamkam ng West Philippine Sea.
Matatandaan na sinimulan noong ika 27 ng Hulyo ang 50 day Rosary Campaign na magtatapos sa ika-15 ng Agosto upang hingiin ang kaligtasan ng Pilipinas mula sa China. |𝙞𝙛𝙢𝙣𝙚𝙬𝙨
