Roxas City, Capiz – Masobra sa 1.4 million families in Western Visayas ang naka-avail sang emergency subsidy sang gobyerno nasyonal sang ginpatuman ang enhance community quarantine bangud sa coronavirus disease 2019 (COVID-19) pandemic.
Ginpahayag ni DSWD- 6 Regional Director Ma. Evelyn Macapobre, ini ang ginalakipan sang 1,130,377 ka mga non-4Ps family beneficiaries samtang 321,096 naman ang mga pamilya nga sa idalom sang Pantawid Pamilyang Pilipino Program(4Ps).
Sa virtual presser, ginreport man ni Macapobre nga nagalab-ot sa P6,782,262,000 ang na-release na sang DSWD paagi sa mga local government units (LGUs) para sa non-4Ps family beneficiaries sa rehiyon base sa rekord as of June 1, 2020.
Samtang, 94 pa gid lamang halin sa 133 ka mga local government units(LGUs) sa rehiyon ang nakasumiter sang complete liquidation report sa DSWD 6.
May kaangut sini, liwat nga gin-panawagan ni Macapobre ang nabilin pa nga mga LGUs nga ipasa na ang liquiation report sa labing madali nga panahon agud nga maumpisahan na nila ang validation.
