South Cotabato – usa patay, usa angol sa nahitabong pagpamusil sa Sitio Tablogan, Barangay Aflek, Tboli, South Cotabato niadtong nakalabayng adlaw.
Giila ang namatay nga si Sahabuden Sulaiman Mamadra, legal age, residente sa Barangay Talcon, Tboli, samtang ang angol giilang si Aris Umal Sulaiman, 24, residente sa susamang Barangay.
Giila usab ang suspek sa pagpamusil giilang si Mario Celis Sulpico, 37, residente sa Purok 1, Barangay Proper, Polomolok, South Cotabato.
Subay sa gihimong imbistigasyon sa kapulisan nasuta nga padulong unta ang suspek sa usa ka tindahan sa maong lugar dihang iyang nakasugat ang duha ka mga biktima.
Igo rang gipangutana sa mga biktima ang suspek apan kalit ra kining mibunot ug pusil dayon gipusil ang mga biktima.
Si Mamadra nakaangkon ug samad sa iyang liog nga hinungdan sa iyang kamatayon samtang si Sulaiman nakaangkon usab ug samad sa iyang tiyan kansa daling gidala sa pinakaduol nga balay tambalanan sa lungsod sa Polomolok, South Cotabato.
Paspas usab nga nakasibat ang suspek human sa pagpamusil ug kasamtangan na karon nga gipangita sa kapulisan. Sa karon ginaandam na ang kasong ipasang-at batok sa nahisgutang suspetsado.
