Patay ang driver sang motorsiklo sa nagluntad nga disgrasya sa dalanon sa Sitio Pula, Brgy. Tubi-ala, Surallah, South Cotabato, alas 7:30 kagab-i, Hulyo 21, 2021.
Ginkilala ang nabawian sang kabuhi kay Jayson Montoya Lorenzo, 24 –anyos single, cannery worker kag residente sang Sitio Sawmill, Brgy. Naci, Surallah.
Imbolbado sa nasambit nga insidente ang isa ka Kawasaki Bajaj nga may sidecar bilang V1, ginamaneho ni Elvert Soliza Samulde, 31-anyos, single, kag residente sang Brgy. Centrala, Surallah, may duha ka pasahero kag isa ka Skygo 125 mc bilang V2 nga ginamaneho sang biktima.
Base sa imbestigasyon sang Surallah MPS, magaovertake kuntani ang V2 sa isa ka motorsiklo nga yara sa unahan niya, apang nagluntad ang head-on collision sa nasugata nga tricycle.
Resulta nakaangkon sang malala nga pilas sa ulo si Lorenzo nga gindeklarar nga dead on arrival sang attending physician, samtang ang driver kag pasahero sang tricycle ang nakaangkon man sang pilas sa mga nagkalain-lain nga parte sang ila nga lawas.
Pareho naman nga nakaangkon sang danyos ang duha ka mga salakyan kag yara na sa kustodiya sang Surallah MPS.
