Davao City – Patay ang usa ka babaye samtang walo ang angol human nadisgrasya ang ilang gisakyan nga elf truck nga gidrayban ni Reynante Tinampay, 43 anyos nagpuyo sa Inayangan Calinan syudad sa Davao.
Sa report gikan sa Davao City Police Office naila ang nakabsan sa kinabuhi nga gitago sa pangalang alyas Malyn samtang ang walo nga naaangol mao sila alyas Llyn ,Sabit, Rebing, Baby, Jen-jen, Nene, Daniel ug alyas Lloy pareho residente sa Sitio Popo Barangay Inayangan Calinan District ning dakbayan.
Sa gihimong imbestigasyon ni Police Officer 2 Peterson Amaguen, nahitabo ang vehicular accident pasado alas 3:00 sa hapon kagahapon didto sa dalang Barangay Lamanan Calinan District ning dakbayan diin sumala pa ang ilang gisakyan dunay karga nga gulay.
Matod sa report, pag-abot sa may Barangay Lamanan duol sa tulay nawad-an og preno ang sakyanan hinungdan nga niatras ug naigo sa railings ang ilang behikulong gisakyan resulta sa pagkabalintong niini.
Ang mga naangol daling gidala sa balay tambalanan lakip na si alyas Malyn apan gideklara na kining dead on arrival.
Samtang ang driver nga si Tinampay mag-atubang og kasong reckless Imprudence resulting in homicide and multiple serious physical injury.
RadyoMaN Don Pulayao
