Dapitan City – Nawad-an sa panimuot ang usa ka 10-anyos nga batang lalaki human siya gidasmagan sa naghaguros nga motorsiklo nahitabo mga alas 12:20 sa kaudtohon dinhi sa may national Highway Barangay Sulangon, dakbayan sa Dapitan.
Ang biktima mao si alyas Dodong, tinun-an sa grade 5 sa Sulangon Central School taga Purok Molave, Barangay Sulangon.
Ang drayber sa motorsiklo nakadsamag kaniya giila nga si Harold Ello, 29 anyos, ulitawo ug angkas niini usa ka Stephanie Gako, 23 anyos, dalaga, polos mulupyo sa Purok Rosal, Barangay Sta. Filomena, dakbayan sa Dipolog.
Sa pakisusi sa kapulisan sa Dapitan, nasayran nga gikan sa lungsod sa Sapandalaga, Misamis Occidental ang motorsiklo nga gimaneho ni Ello ug padulong na unta mopauli.
Apan pag-abot sa dapit nahitaboan, kalit lang nga nitabok biktima sa may tabok nga bahin sa highway hinungdan nga siya nadasmagan sa maong motorsiklo.
Tungod sa kakusog sa impact ang biktima nalagpot matud pa ug nawad-an sa panimuot, samtang ang driver ug sakay sa motorsiklo nakaangkog grabing kadaot sa ilang kalawasan human nalamba sa karsada.
Ang tulo ka nga nalambigit sa disgrasya daling gipanghatud sa Dr. Jose Rizal Memorial Hospital aron katambalan.
