10 ka mga establishemento nahatagan sang Safety Seal Certification sang DOLE 12.

Yara na sa napulo ka mga establishemento sa rehiyon dose ang nahatagan sang Safety Seal Certification sang Department of Labor and Employment ukon DOLE 12.
Sa nasambit nga numero tatlo ang halin sa Polomolok, South Cotabato, lima sa General Santos City kag duha sa Cotabato province.
Ang aplikasyon sang mga establishemento sa Safety Seal Certification ang gin-aprobahan, matapos ang ginhimo nga inspeksyon kag balidasyon sa pagsunod sa minimum public health standards kag iban pa nga kinahanglanon sa Safety Seal Certification Program base sa DOLE-DOH-DILG-DTI Joint Memorandum Circular No. 20-01 series of 2021.
May-angot sini, nagalaum si DOLE 12 Regional Director Raymundo G. Agravante nga padayon ang pagsunod sang nasambit nga mga establishemento sa minimum public health standards kag mangin halimbawa man sa iban.
Nahibaluan nga ang Safety Seal Certification ang ginahatag sa mga establishemento nga nagasunod sa minimum public health standards nga gintalana sang gobyerno kag pagpatuman sang StaySafe.ph contact tracing.
Mangin balido naman ang safety seal certification sa sulod sang anum kabulan kag liwat ang mga ini nga ipaidalom sa inspeksyon.
Sakop sang DOLE sa ginahatagan sang safety seal ang manufacturing, construction sites, utilities (electric, water, gas, air conditioning supply, sewerage, waste management), information and communication companies kag warehouses.

Facebook Comments