Ginpabakwit ang 10 ka mga pamilya ukon yara sa 32 ka mga indibidwal sa Purok Mabuhay 1, Barangay Carpenter Hill, Koronadal City tungod sa nagluntad nga landslide sa lugar epekto sang pagbubo sang mabaskog nga ulan kahapon sang hapon.
Suno kay Brgy. Carpenter Hill Kapitan Benedicto Pastera, isa ka balay ang totally damaged sa nasambit nga landslide.
Temporaryo naman nga nagtinir sa barangay gymnasium ang mga apektado nga pamilya.
Tigayon naman suno pa nakahatag sang inisyal nga ayuda ang barangay kag city government sang Koronadal.
Samtang base sa inisyal nga assessment sang city government sang Koronadal suno kay Pastera tatlo ka mga balay ang indi pa pwede nga mabalikan lakip na ang isa nga totally damage.
Gin-advisan niya man suno pa ang mga bakwit nga indi anay magbalik kon maglain ang panahon.
Ginkumpirmar man ni Kapitan Pastera nga tungod sa pagbubo sang ulan ginbaha ang halos mga purok sa barangay nga nagapadayon pa ang ila nga assessment kon pila ka mga pamilya ang apektado.
