10th ID maghimo og parallel investigation labot sa sundalo nga gipatay sa kabaro

Davao City- Maghimo ang 10th Infantry “Agila” Division Philippine Army og usa ka parallel investigation aron tukion ang kamatooran kon kabaro ang nagpusil-patay sa usa ka sundalo nga nahitabo sa Tagum City Davao Del Norte sa nakalabay’ng semana.

Suma ni 10th ID Spokesperson Army Major Mark Anthony Tito nga mupahigayon usab sila og separar nga imbestigasyon aron ma-establisar kung si Corporal Reibong Medalla ang mipusil-patay sa sundalo nga si Jayson Cawayan nga taga-Montevista, Davao De Oro nga natigayon sa Purok 4 Santol, La Filipina, Tagum City 12:00 sa tungang kagabhion niadtong Biyernes sa miaging semana.

Apan sa inisyal nga kasayoran, gikanayon ni Tito nga gihimakak ni Corporal Medalla ang pasangil nga siya maoy mipusil-patay sa biktima sanglit niadtong oras sa panghitabo anaa sa ilang buhatan ang suspek.

Gani giingon ni Tito nga giimbitahan ra sa Tagum PNP si Corporal Medalla alang sa imbestigasyon human nga mao kini ang gitudlo sa giingong nakasaksi sa krimen butang nga gilimod sa naasoy nga Corporal.

Gibutyag pa ni Tito nga sa karon, mag-convene pa ang mga mulangkob sa pagahimoong parallel investigation hinoon wala na gipamulong sa opisyal kung si kinsa ang mga mahimong kabahin sa team nga mangimbistiga sa panghitabo.

Nasuta sa inisyal nga imbistigasyon, sakay sa motorsiklo ang biktima kauban sa iyang hiniguma dihang usa ka mamumuno ang kalit mibutho ug dayon pusil sa tumong sa biktima.

Gisuwayan pa og dala sa tambalan sa dakbayan sa Tagum si Cawayan apan sa dalan palang nakabsan na kini sa iyang hinuwamang kinabuhi.

RadyoMaN Joel Viray