Davao City –Wala pa’y nadawat nga direktiba gikan sa higher headquarters ang 10th Infantry Division Philippine Army kalabotan sa gideklara ni Pangulong Rodrigo Duterte nga unilateral ceasefire tali sa CPP-NPA-NDF nga magsugod sa Disyembre 24,2017 hangtud sa Enero 2, 2018.
Matud ni 10th ID Spokesperson Captain Jerry Lamosao nga gipaabot na lamang nila ang kopya sa pormal nga deklarasyon sa unilateral ceasefire gikan sa kampo Aguinaldo alang sa mga guidelines sa suspension on military operation batok sa teroristang CPP-NPA-NDF panahon sa kapaskuhan.
Sigun ni Lamosao nga magpadayon gihapon ang gimbuhaton sa kasundaluhan apan dili sa operasyon inay sa pagtunol og serbisyo alang sa mga katawhan nga nanimuyo sa kabukiran partikular sa infested red areas nga mga barangay.
Nanghinaot ang tigpamaba nga tugbangan sa CPP-NPA-NDF ang deklarasyon sa gobyerno nga ceasefire apan gilauman na sab daan sa opisyal nga muhimo gayod og dili maayo nga aksyon ang mga komunista batok sa tropa sa gobyerno ug sa mga sibilyan.
Bisan og dunay magpatigbabaw nga tigil putukan sa bahin sa militar magpabilin gihapon nga alerto ang kasundaluhan alang sa posibling atake ug harassment nga pagahimoon sa mga teroristang CPP-NPA-NDF.
Hangtud sa pagtaho niini, wala pa’y gipagula nga pamahayag ang CPP-NPA-NDF kung magdeklara pod ba sila og ceasefire sulod sa napulo ka adlaw.
RadyoMan Joel Viray
