Davao City- Suportado sa 10th Infantry Division Philippine Army ang tinguha ni Mayor Inday Sara Duterte-Carpio nga localized peace talk tali sa mga NPA nga naglihukan sa siyudad sa Dabaw.
Sumala ni 10th ID Deputy Commander General Bienvenido Datuin, wala sila’y nakitang babag aron dili paluyuhan ang localized peace talk tali CPP-NPA-NDF pinaagi sa paningkamot ni Mayor Inday Sara.
Malaumon si General Datuin nga dili ipareho sa mga komunista ang localized peace talk sa nahagba nga hinabing pangkalinaw sa GRP panel ug CPP-NPA-NDF kung asa igo ra sila nagpakusog sa ilang puwersa.
Dakong matabang sa kalampusan sa localized peace talk kung pareho magpakita og pagrespeto ang lokal nga kagamhanan ug ang mga NPA nga naglikuhan sa ikaduha ug ikatulong distrito sa dakbayan.
Gitin-aw sa Heneral nga dili maghunong ang military operation bisan og adunay localized peace talk gawas kung i-mando sa nasudnong kagamhanan ang pagsuspender niini.
Tumong lang unya sa operasyon nianang panahona mao ang paghatag og seguridad ug serbisyo pinaagi sa outreach program nga gikinahanglan sa katawhan samtang matigayon ang hinabing pangkalinaw sa lokal.
Samtang pikas bahin, wala gikalain sa 3rd Infantry Battalion Philippine Army nga nakabase sa Malagos ang wala paglakip kanila sa Davao City Peace Committee nga gimugna ni Mayor Inday Sara.
Gikanayon ni 3rd IB Commander Lt.Col.Raymond Lachica nga nasabtan ra niya ang hukom sa Mayor sanglit nagtoo kini dili buot sa inahan sa siyudad nga mabalda ang localized peace talk tungod nila.
Kasamang Joel Viray
